開飯啦！有冇諗過你屋企食嘅嘢，都可以就地取材，攞嚟護膚呢？細細個小言媽咪已經教落用洗米水洗面，大部分人洗完米之後都會直接到左啲洗米水，但其實，洗米水係「寶」嚟架！
點解？因為白米裏頭有水溶性嘅「維他命」及「礦物質」，經過洗米時嘅摩擦而殘留洗米水中，蘊含非常豐富嘅維他命B雜，可以去油，淡化色素同預防脂肪粒。如果可以好似小言媽咁一直堅持用呢個方法，皮膚就會變得光滑、有彈性！
但係要留意，洗完米嘅洗米水，要等最少三個鐘，等啲洗米水沉澱好後至用。底層嘅洗米水好多沉澱物，所以用上層洗米水洗面最好。
而我本人就比較鍾意用麥皮，因為佢除咗含多種維他命 B，減輕炎症，促進細胞再生，美白同埋抗氧化。麥皮又可以吸油，淨化雜質之餘又可以保留水份，性質溫和，唔容易敏感。
我成日用麥皮加1茶匙蜜糖再加上1隻蛋白攪勻做面膜，敷15至20分鐘，好正！
又或者用麥皮溝鮮奶做磨砂，係最天然嘅去角質方法！想保濕就用一茶匙蜂蜜加半隻香蕉加埋麥皮一齊，攪勻做面膜，等15至20分鐘過水。
Search